الحمام ايام زمان ؟؟؟

قصة الحمام السوري والعياذ بالله
بتعرفو ليش كنا نكره الحمام نحنا وصغار رح بحكيلكن ليش....
هاد ياسيدي بزماناتو بالعيلة كانت الأم هي الراعي الرسمي لحمام ولادها
وكانت تعذبنا مو تحمننا والمرحلة الأولى من العذاب كانت بتشليح الأواعي
وخصوصاً إذا كنت لابس كنزة صوف لإنها عادةً بتكون ضب عند الرقبة ومابتنشلح إلا بصعوبة
بتمسك أمك الكنزة من تحت وبترفعها لفوق
بطير راسك وأدنيك بنمسحوا وإنفك بنكسر المهم تشلحا
بتجيك المرحلة الثانية
بتقعدك عالأرض قرفصة وكأنها بدا تعدمك وبتقلك ثبت حالك
أنت هون ............ وبتبلع ريقك وبتعرف إنها رح تحارب فيك
بتجي مرحلة الجد....وبتكون حرارة المي تحت درجة الغليان بنتفة
بتكب فوقك طاسة مي نار بتنط بأربعتك وبتولول
بتخرطك كف بتلف بأرضك متل الصياح وبتخرس
بتحط فوق راسك لوح الصابون وبتبلش
مابتحس غير راسك طاير يمين وشمال وشرق وغرب
منوصل للمرحلة الأصعب(( التلييف ))
بتلبس بإيديها كيس تفريك هاد الأسود
وعلى زماننا كان خشششششن وكأنو ورق قزيز أو ديسك صاروخ للجلي
بتمسكك منيح وبتبلش فرك وكأنو إنت قداما المصباح وبدها تطالع المارد منك وبسيخ كل جسمك وبيقلب لونك متل الشوندرة
ولما تخلص بعدا بتلفك بالبشكير وبتقلك روح لزاق بالصوبية وبترفسك لبرا وبتصيح يلي بعدووووووووو
وخاصة حمام العيد



بس الله يرحم هدك الايام كانت حلوة كتيرر

عذاب بعذاب