تخيلات الاول من نيسان

اليوم 1 نيسان
اليوم الصبح فقت ع بكير بدي اعمل فنجان قهوة ..لقيت الغاز خالص
اتصلت مع بياع الغاز خمس دقايق بالعدد جبلي جرة بالسعر النظامي .
لقيت الكهربا مقطوعة عطل فني ها . ما تفكروا بتقطع الكهربا عنا ...
حكيت مع شركة الكهربا ربع ساعة اجو صلحوا العطل واعتذرو منا وراحوا ....ووصونا ما نحكي والا ممكن الوزير يستقيل مشان هالعطل بحارتنا ....

المهم
عندي كان زيارة لمريض بمشفى حكومي
وليييي على طولي
الورد والترحيب خجلونا صراحة ...الأعتناء بالمريض ولا بأوربا

ونحنا راجعين
الطرقات شي ناهي ...لا مطب ولا حفر
والشرطي ما بيخالف الا لسبب يعني بالحق وما بيظلم حدا ...
وما حدا بيخالف قانون السير
لدرجة شفت مسؤول راكب سيارة عادية نوع سابا...ووقف ع اشارة المرور عادي متلنا ....

المدارس حدث ولا حرج عن النظام وعن الدروس تقول مدارس خاصة مو هيك .....

الدوائر الحكومية بتفوت عليها خمس دقايق
بتلاقي الموظف بالو طويل وما بيزعجك ولا بيصرخ بالمراجعين ... ورايق اسمالله مع الكل ..وما في خيار وفقوس ...كل واحد بدورو .....
والاحلى من هيك
فيك تكتب براحتك ع صفحتك ...وتنتقد اي مسؤول
ولا حدا بيقلك جرائم الكترونية وووو
بالعكس المسؤول بيعتذر من الشعب (( اللي هوي نحنا )) عن التقصير ويمكن ينتحر اذا بمطرح ما كان شي غلط ....

الرواتب ولا سويسرا .... والحكومة كل يوم بتطلع بيان فكوا الحزام ...فكوا الحزام ...تبحبحو ....تشبرقوا ....

ما بدي احكي عن الاعتناء ورد الجميل لجرحى الحرب واهالي الشهداء
لدرجة بطلو يقطعو عليهن ضريبة دخل ....
هادا اللي صار معي ب 1 نيسان ، صدقوني

بالظاهر بالمنام و باول نيسان
ممكن يصير هاد الحكي