خواطر التعليم الرسمي و المعاهد الخاصة

احكيلي عن التعليم يا ابني ..
- التعليم عنا صاير بالمدارس الخاصة ..اقساط حلوة كتير و تتناسب مع دخل و صمود المواطن في مواجهة الأعداء ..

يعني مثلا ..
روضة 200 الف ليرة
ابتدائي 300 الف و 400 الف و انت طالع

بتعرف الاساتذة متخرجة من السوربون و من اكسفورد .. براتب أقل من المتوسط و هيك بتقدر تقول أنه الاستاذ معتبر المدرسة باب تعارف على الطلاب من شان يستجرهم الى طريق الدورات الخاصة

أما عن الاوتوكار أو الباص له قسط لوحده .. لأنه ليموزين و بيجي معه آنسة حلوة بتعرف تعزف على الواتس اب و تسكّت الطلاب و تحكي مع الشوفير بآن واحد ..

- اي عم شوف اعلانات بالشوارع , عن المدارس ..
- مزبوط نحن الوحيدين في العالم اللي منحط اعلانات طرقية للمدارس ..

- طيب هي بتكلف ملايين , بلا يعملوا اعلانات و يقطعوا التكلفة من قسط الطالب
- قول والله ؟ , رب الأسرة شو شغلته ؟؟ هو اللي عم يدفع كل شي ..مو عم يستثمر ابنه بالعلم ؟؟ هو اربح استثمار بالدنيا استثمار الابن .. فتخيل عنده 3 أولاد !!! رح يدفع و ينبخش .. عادي يعني تعود على البخوشة ...

- ومادور وزارة التربية ..؟
- سؤال حلو و تكتيكي .. وزارة التربية شغلتها تجيب آنسات شغلتهم يقعدوا بالبيت يقبضوا الراتب .. أو يدرسوا الطلاب بما يتناسب مع الراتب الخرافي الذي تقبضه من المدرسة ..
و هيك صارت المدارسة الحكومية متدنية كتير .. بهيك حالة , يهرع ( ركز على كلمة يهرع ) الطالب الى التسجيل في المدارس الخاصة , و هيك بتصير وزارة التربية شريك غير مباشر في العملية التعليمية !!! كله مدروس ...مافي شي بيجي عن عبث ... و بالعلامة الوزارة ساكتة عن اقساط المدارس الخاصة , و ماعم تحكي شي ..

الله يرحم أيام الكندي و نابلس و فوزي الجسري و الفتح و المأمون ... و و و
و يرحم المدارس الخاصة و اللي كانت فعلا خاصة و اقساطها كانت مقبولة مقارنة مع الدخل , و تخرّج منها ناس رفعوا راس هالبلد بس برا البلد ...

يعني من الأخير ...
عم يقولولك .. حبيبي اذا بدك تنجح بهالبلد لازم تصير مسؤول ..
و المسؤول مابدو شهادة ...

المنافسة عنا بالمدارس الخاصة : اللي قسطه أكتر و اعلانه أكبر ,, معناها مدرسته أكوس
و ادفع يا رب الأسرة .. ادفع

حسام وتار
#خواطر_مع_ابوبكري

منقول من صفحات الفيس

هذه الحال في هذه الايام

نعم و اصبحت عرفا