عزيزي ادم كن لطيفا برمضان

عزيزي الزوج أكيد مو الكل ) .
شهر رمضان هو شهر اوله رحمة و أوسطه مغفرة و آخره عتق من النار
خليني اشرحلك ياها شوي .. شوف روحي
يعني العصبية و العنترية قدام مرتك ع اساس انت صايم و خرمان على سيجارة و فنجان قهوة بطلت من زمان ..

و لما بترجع ع البيت قالب خلقتك و شايل معروكة و كأنك فاتح الأندلس ... و بتقدم نشرة عن اسعار المعروك قبل الأذان بربع ساعة بصوت عالي .. كلنا منعرف هالحكي و الله يرزقك .. (بالأخير تلات ارباعها بتاكلها انت ..)
مو بس انت صايم بالبيت .. و مو ضروري تكون عصبي من شان تنعرف بانك صايم
كل اهل بيتك صايمين متلك .. و كلهم جوعانين و عطشانين و بيجوز ابنك كمان خرمان ع سيجارة ...

و مرتك الصايمة اللي فايقة من الصبح عم تحضرلك وجبة الفطور .. و عم تغسل الغسيلات و عم تحوس البيت من شان حضرتك تلاقي لقمة طيبة و هدمة نظيفة .. هالمخلوقة كمان بنت خلق و عالم و ناس ..و عم تعتني بكرشك اللي صاير متل دعاية نيدو ( تنمو معه الأجيال ) ...

بيجوز الأكلة تطلع مالحة شوي او نسيانة مرتك تحط شي شغلة بالأكلة .. معلش هي كمان صايمة و مابتقدر تذوق الأكل من شان حضرتك ترضى ..

كلمة حلوة لمرتك بعد الافطار بدل ماتصرخ عليها و تقوم من ع الطاولة و تقعد بغرفة القعدة تمسك الريموت كونترول او تفتح الفيس و تمد رجليك و تحرك اصابيع رجليك متل عدنان و لينا .. و كل شوي تصرخ : ولك وين الشاي ؟؟ وين النفاضة ؟ وين القهوة ؟؟

هدول بشر و روح ..
كل اهل بيتك واقفين ع نكشة ..

احسن من كل هالحركات القديمة .. روح احجز شي اوتيل او شاليه وطلاع عابلاد برا
و فرح عيلتك برحلة ع العيد اللي كلهم كانوا قاعدين بخدمتك . بعرف ماخرجك اقعد وسكوت .

مرتك اللي متحملة نق اولادك و فحوصاتهم و غسيلاتهم و مشاكلهم و همومهم و انت طرزان قاعد بالشيالات ... صايم لا تدقروني ...
والله و اللي اسمه الله .. اذا بتتركك مرتك بنص رمضان .. رح تخليك متل الضايع و بهداك الوقت رح تحس بقيمتها .. فهمت و لا أعيد ؟

(بعتذر لأنه عليت صوتي بآخر سطرين و انفعلت شوي )
بس الحق لازم يقال و لو ع قطع الراس ..

حلوة و ظريفة

كلام صحيح