اذا ما زرت هي الاماكن معناها ما ابتعرف شي عن حلب

قال احدهم
في العام 1983 عملت دورةالضباط المجندين في مدرسة المشاة في حلب وتعرفت فيها على صديق حلبي رائع ..
كان ياخذني بعد الظهر ويعزمني على بيتهم في حلب ..
وعرفني على أهلو ..!!

وما بنسى كلمات أبوه لما سألني :

-شو بتعرف عن حلب ؟

عددتلو الأماكن الي زرتها بحلب ..ضحك وقال :

حتى تعرف حلب :

لازم تكون صليت بجامع الصديق وطلعت اشتريت فستق حلبي من شي بسطة على بابه..

أو صليت بكنيسة اللاتين وطلعت أكلت سابليه من عند فيتا ..

لازم تكون جبت حليب غنم من عند الصقال بالجميلية ..

وجبت مونة البيت من عند التبان بالسبع بحرات ...

لازم تكون أكلت حلاوة الجبن وبوظة من عند سلورة ..

ولازم تكون أكلت بوظة كرز وبوظة شراب اللوز من عند العطار ..

ولازم تكون أكلت كاتو بهارات وغريبة اسطنبلية من عند الصباغ ...

لازم تكون شي يوم جمعه رحت ع الجديدة ووقفت ع طابور الدور مشان تشتري بعشرة فول من عند حج عبدو ..

أو مامونية وشعيبيات من عند الطرابيشي ...

لازم تكون مرتك حضرانه عرس بقهوة البرتقان او دار اﻻفراح وانت واقف برا عم تستنى تطلع مشان ترجعها عالبيت هي وكنة بنت سلفة خالتها وجويرينها بالبناية ﻻزم تكون انعزمت على إكليل بكنيسة ..
وعرس مختلط وعرس شراكسة ..

لازم تعرف جب القبة للجبنة وباب الحديد لزيت الزيتون ومية الفرنجي وكرم الجبل لمونة البرغل

والسقطية للكماية .. ومهروسة لغزل البنات ..

وكسحة والقبرصي والناصر للزعتر والصابون

ﻻزم تكون اخدت سيراميك بيتك من باب انطاكية او كم بلوكة مشان تعلي دربزون سطوحك ...

ووقفك كم واحد وقلك ﻻزمك عتيلة او جرار

ولازم تكون مغير وجاه الكراسي من عند قماش جبسة أو الصباغ ..

وشيري عدة خياطة وتطريز من عند البادنجكي وراء الجيمع ..

ولازم تعرف أنه ناظو للفضة .. وحنيفة للذهب ..

وبونجة وعبود للألماس ..

وساحة فرحات للذهب المموض ..

والإليغانز ونجيب اليان للقماش التقيل ..

لازم تكون صورت صورة شعاعية بعيادة دكتور نورس .او عيادة دكتور فيصل ..

ولازم تكون متصور عند ديكران أو حتى هو مصور عرسك ..

ولازم تكون صلحت سيارتك بالميدان عند معلم سركيس ومامطالعك إﻻ رضيان وفوقها حبة مسك

ﻻزم تكون اشتريت عدة من جادة الخندق ..

وكراسي خشب وطاوﻻت من بوابة القصب ...

لازم تعرف خط الفرنسيسكان وزحمة سوق الإنتاج ومستشفى التوليد والعبارة والتلل والعزيزية وباب الفرج وسوق المدينة ..

وﻻزم تكون شيري مستلزمات المدرسة من مكتبة اطلس والفاروق ..

ولازم تكون لعبت وﻻدك بحديقة السبيل واخدتون فرجيتون ع سعيد والبط واﻻرانب بالحديقة العامة ..

وﻻزم اكلت درة مشوية على طريق الفرقان ..

وشربت اركيلة بقهوة القلعة والخان ..

وﻻزم تكون حضرتلك شي مسرحية بنقابة الفنانين ورحت شفت لعبة سلة بصالة اﻻسد ..

ﻻزم تكون دقت فطايرالذواق

واكلت فلافل بخبزه صاج من عند النزهة والفيحاء ...

وﻻزم تكون بسيارتك سيديات لصباح فخري او نور مهنا اوشادي جميل والدايخ وصبري مدلل

وحتى تكون حلبي مزبوط ﻻزم تكون سمعان آذان الظهر مع جرس الكنيسة سوا اذا كنت ميرق من رعاية الشباب او بالفيلات

وحتى تكون حلبي بيكون مر عليك ألف قصة وقصة .. وألف ذكرى وذكرى ..

وحتى تكون حلبي بدك تحط ع الجرح ملح

ومو بس ... ﻻزم تكبسه لتقدر تعيش حاضرك ..

وتكمل يومك اللي ما بقي فيه شي حلبي حلو .. !

والله اشتاقتلك يا حلب وأهل حلب ...!!

"منقول من اجمل ما قرات عن حلب

مقال رائع جدا