يلعن ابو التكنولوجيا . رجعولنا ايام زمان

كتب رجل  غاضب على التكنولوجيا 

يلعن أبو الفيسبوك ع أبو اللي اخترعوا
بطلنا نشوف حدا ولا نقعد مع حدا ولا نعرف حدا ولا نقرب على حدا
بطلنا نقعد ع باب الدكان نشرب كاسة شاي مع جيرانا 
بطلنا نطلع ع سطح جيرانا و نرمي حجار صغيره ع اولاد الحاره 
بطلنا ناخد معنا كيس بردقان و نزور اللي اجرو مكسوره و ناكل البردقان عندو 

نسينا اشكال الناس 
لا بعرف مين جيرانا ولا مين جنبنا 
بطلنا نروح ع جارنا اللي اجا من العمرة يشربنا مية زمزم

العزا عالفيسبوك 
والعرس عالفيسبوك 
والخطبه ، واللمة ، والخِلفة ، والطوشه ، و ام ابراهيم غادرت المجموعه 

الاحساس صار عالفيسبوك 
ابتسام تحس بوجع رأس 
و خالد يشعر بالنعاس 
و عمر يشعر بالحب 
ووفاء تشعر بالوحدة 

حتى اذا اضطرينا وقعدنا مع بعض كل واحد وجهو ضاوي من موبايلو ، وعالفيسبوك 
وبتوصل معنا انو نحكي مع بعض عالفيسبوك واحنا جنب بعض 

فش لمة نسوان الصبح تحت الياسمين
صار في مجموعة بنات العيله عالواتس اب و نسوان الحارة كلو تكبيس و سحب وتحشيك

كانت جارتنا تفتح بالفنجان لكل نسوان الحاره الصبح وكلو كذب 
و تفسر احلام غلط 
بس كانو مبسوطين 
هسا اذا حلمنا ما النا الا جوجل 

كانت جارتنا اذا طبخت صحن رز تنادي ع امي من الشباك تذوق منو

هلق بنصورو و بنزلو انستغرام 
و بناخد رأيهم بالصوره 

يا عمي بدي اقعد بالحاره 
بدي العب طماي ، بدي اتخبى ، بدون محدا يمسكني اونلاين عالواتس اب 
ولا اون لاين عالفيسبوك 

يلعن ابو التكنولوجيا 

رجعولنا زمان