خلصنا الحرب العالمية الثالثة بسورية و الرابعة عليكم

يلي مو مستوعب انه الشعب السوري من 9 سنوات فايت بحرب عالمية ثالثة بس من نوع آخر.... بيكون موعرفان شو عم بيصير لأنه:

*يوم يوقف ختيار وختيارة عمرهم فوق ال 80 سنة ع دور الغاز ليحصلوا على جرة غاز حتى يطبخوا عليها وولادهم في الغربة هاي حرب عالمية ثالثة

*يوم ينجلط شخصين واحد بحلب في الزبدية والتاني بركن الدين في الشام عدور الغاز ويموتوا وما حدا يسئل فيهن هاي حرب عالمية ثالثة

*يوم تضج مواقع التواصل الاجتماعي "باللص السوري" يلي دخل ع بيت نانسي عجرم وقوصوا جوزها وقتلوا بدم بارد وبيعملوا فيديو مفبرك على وسائل الإعلام والكل يتعاطف مع الساقطة نانسي و المجرم جوزها وما حدا يسئل "بهالشب السوري" ليعرف ليش هالشخص السوري عمل هيك ...هي بتكون حرب عالمية ثالثة

*يوم يركض المواطن مشان رغيف الخبز وتصير الكهربا حلم وبيصير الغاز من رفاهيات الحياة ... هاي حرب عالمية ثالثة

*لما بتلاقي اطفال عريانة وعم تنام بالشوارع وعم تموت من البرد والجوع والقهر هي حرب عالمية ثالثة..

* لما تشوف رجال طول وبعرض عم يبكي قدامك مافي جيبو غير مية ليرة وولاده عم يستنوه في البيت جوعانين وهو ماعم يعرف شو بدو يطعميهم ... وفي ليلة راس السنة انصرفت ملايين الدولارات في دول الخليج وعنا ....هي حرب عالمية ثالثة.
صدقوني الحرب عايشينها ك سوريين من زمان فلا تتابعوا اخبار وتشغلوا حالكن وتضيعوا وقتكم ...لأنه نحن كسوريين عايشيين الحرب العالمية الثالثة من زمان.

واذا بدكن تخافوا خافوا من الحرب العالمية الرابعة لانه نحنا سبقنا العالم كله وفي فارق بينا حرب....والحرب العالمية الثالثة ختمناها وبدرجة ممتاز وثابر إلى الأمام

دمتم ودام الوطن بألف خير
تصبحون على فرج قريب

رح تخلص علينا سنة ٢٠٢٠