ايام لا تنسى عشناها بمدينة حلب

بحلب ....


سمعت قصص وشفت وعشت بهل كم يوم مشاعر لا تنسى ..


من فقر .. وقهر وهموم للسما .. بس ما لقيت بروح حدا قلة الحيلة ..!!


بحلب
البرد بقص البسمار ، والقذائف السودا ما بترحم حدا ، ومع هيك اول ما تطلع الشمس وتهدى الحالة بتلاقي الناس تزهزهت رغم كل شي وعبت الشوارع والطرقات ولو ع صحن درة او كاسة سحلب .


بحلب
الصبايا والشباب ما تخلوا عن الموضة وكل مين ع قدو .


بحلب
النسوان تحملوا هموم الحرب وجلوا بمي مبوظة ووقفوا بدور الغاز ...وباعوا الدهبات لتستر بيتا وجوزا ولما بتجتمع بنسوان متلااا.. بتضحك وبتقول ابو عبدو ما برضى الا يجبلي التوم مقشر .


بحلب
الضحكة مؤجلة والبكوة واقفة عالباب بس الدمعة ما بتنزل .


بحلب
الصغير ابن تلات اربع سنين بيعرف صوت القذيفة نزلت ولا طلعت بس الصبح بياخد صندويشته وركد ع مدرسته ليكمل علمه .


بحلب
الشغل واقف بس الحلول موجودة عند كل حلبي
صحيح ترك مصلحتو الحلبي بس ما مسك مسبحتو وقعد ع قهوة وحط ايدو ع خدو .


بحلب ..
الكل مستني طريق الشام يفتح وقبله المطار بأمل الخير يرجع وما خاب مين عاش الليل ومستني الصبح .


بحلب ..
الجمعة بركدوا الشباب عالملعب ليشجعوا نادي الاهلي وبتراهنوا ع كم طابة بدون يربحوا وبشتروا قميص النادي حتى ولو كان بالدين


بحلب
بتسمع تنين عم يتشاركوا وبقولوا عنا فكرة جديدة ورح نقول يالله ، وبنهزموا ع بيوتون بعد ما نزلت قذيفة قريبة وبقولوا لبعض بكرا منكمل حديثنا .


بحلب ..
يوم الجمعة وحوليه القلعة بتلاقي الناس عم تجك وتغلي يمكن لتاخد طاقة إيجابية من هالحجار العتيقة او لتأكد النسب .


بحلب
بيحكوووا مع الولاد إلي برا بعد اي قذيفة او اشتباك وبقولوووا لا تخافوا علينا وهديت وما ضل شي ، وحسبوا حسابكون بزيارة لحلب لنعملكون كبة بسفرجليه لان وقت السفرجل بأخر الصيف ... مو تروحوووه متل وقت الكمايه هاااا.. عم قلك... وبسكر وبسخن الفول وبحمدو وبشكرو


بحلب
مشاعر مختلطة بين القهر والامل ... بين الابيض والاسود ..
مشاعر بتعلمك ليش حلب الله اختارا لتكون اقدم مدينة .. مأهولة بالعالم .


لان بإختصار
مر عليها كتير وكلو راح وبقيت حلب 🧿

الكل مستني طريق الشام يفتح وقبله المطار بأمل الخير يرجع وما خاب مين عاش الليل ومستني الصبح .