الحامل ايام زمان و هاي الايام ..

من زمان ماكان حدا يعرف انو ( فلانة ) حامل ولا مانا حامل ؟! اصلا كان سر خطير! كانت اللي تحبل يكون الموضوع only me وما حدا يعرف الا جوزها ، وامها ، وامو ، حتى أحيانا الدكتور يخبو عليه .
اما هلق ، يا حبيبي ، ولك يا حبيبي!
هلق الوحدة اذا وهي قاعدة مع جوزها ، اذا اقترحو ، او اتفقو ، او قعدو قعدة عصف ذهني ، وقررو انهم لازم يجيهم ولد ، نص سوريا عالسوشال ميديا بتعرف !
عالسريع بتنط زمردة وبتكتب : اتفقنا .
مع انو لسا لسا ما صار شي ، اصلا لسا ما فاضيين يقعدو لحالهم ، لسا ماصار شي ، بتنط وتكتب : حاسة حالي رح اشعر بالدوخة والفواكه والراحة!
واذا تمت العمليه ، وحبلت ، هون بنكون اكلنا هوا ، هون بدها تخلينا نعيش بالحمل لحظه بلحظه ، رح تحس انو انت اللي حامل!
عليم الله في وحده من كتر ماكتبت عن حملها ، صار بطني يوجعني ، وصرت حس في شي عم يرفس ببطني .
بعد شوية وقت ، بتكون رايحة عالدكتور ، وفرجاها البيبي ببطنها ، بتاخد الصورة ، وبتنزل صورة اشعة اصلا ما مفهومة ، مرة فكرت الصورة منخفض جوي ، وكاتبه فوقها :
ليكو حبيبي و روحي و سندي .
ولك سند مين؟ هو قادر يسند حالو؟ مهو عمرو ٤ شهور ، اذا عطستي بيفلت .
بعدين لحقتي تحبيه؟! هو خطيبك؟! سند مين يا ام سند؟!
بعد كل هاد ، بس تولد ، ما بتنزل صورتها منشان الحسد والعين .
ولك بالله؟! بحياة اختك؟! امانة الله عليكي؟!
هلق تذكرتي الحسد؟! وحدي الله يا موسوسة!!
قال بتنزل صورة طرف ايدها ، وبتكتب : اخاف عليكي من عيون الناس ونقهم !
ولك ماهي عيون الناس شافوها وهي بتتكون ، يعني انتي وصلتينا لنص البير وقطعتي الحبلة فينا.
٩ شهور وانتي معيشيتنا اللحظه بلحظة ، وعند مانتعتيها ، خفتي عليها من عيوننا !!
يلا نترحم ع ستي ، اللي كانت تحبل وتولد وتدخل بنتها المدرسة ، وبعدها خجلانه تحكي لجدي !

ههههه شر البلية ما يضحك