اوقعت زوجها و كشفته على الفيس

ﺍﻋﺘﺮﺍﻓﺎﺕ ﺍﻣﺮﺃﺓ
ﻭ ﺃﻧﺎ ﻓﺎﺗﺤﺔ ﺍﻟﻔﻴﺲ ﺑﻮﻙ ﻟﻘﻴﺖ ﺯﻭﺟﻲ ﺑﺎﻋﺘﻠﻲ ﺃﺩﺩ ﻋﻠﻰ ﺣﺴﺎﺑﻲ ﻳﻠﻲ ﺃﺻﻼ ﺃﻧﺎ ﻛﺎﺗﺒﺔ ﻓﻴﻪ ﺍﺳﻢ ﻣﺴﺘﻌﺎﺭ ﻏﻴﺮ ﺍﺳﻤﻲ ﺍﻟﺤﻘﻴﻘﻲ
ﻗﺒﻠﺖ ﺍﻻﺿﺎﻓﺔ ﻭ ﺻﺎﺭ ﺍﻟﻌﻴﻨﺘﻴﻦ ﺻﺪﻳﻘﻲ .... ﻗﺎﻡ ﺷﻴﺦ ﺍﻟﺸﺒﺎﺏ ﺻﺎﺭ ﻳﺤﻜﻴﻨﻲ ﻋﺎﻟﺨﺎﺹ ...
ﻭ ﺑﻴﻨﻲ ﻭ ﺑﻴﻦ ﺣﺎﻟﻲ ﺻﺮﺕ ﻗﻮﻝ :
ﺃﻧﺖ ﻭﻗﻌﺖ ﻭﻟﻼ ﺍﻟﻬﻮﻯ ﺭﻣﺎﻙ ؟؟ ﻭﻗﻌﺖ ﺑﺤﻀﻦ ﺃﻣﻚ ﻭ ﺃﺑﻮﻙ !!!! ﺃﺟﺖ ﻓﺮﺻﺘﻲ ﻟﺤﺪ ﻋﻨﺪﻱ ﺃﻧﻲ ﺃﺧﺪ ﺣﻘﻲ ﻭ ﺃﺷﺮﺑﻚ ﺣﻴﺎﺗﻮ ﻭ ﺃﻟﺨﺒﻄﺎ .. ﻭ ﻟﻮ ﺃﻧﻮ ﻋﻠﻰ ﺣﺴﺎﺑﻲ ﻭ ﻣﻦ ﺇﻳﺪﻱ .. ﻭ ﺑﺎﻟﻨﻬﺎﻳﺔ ﺑﻜﻮﻥ ﻋﻢ ﺷﻮﻑ ﺧﻴﺎﻧﺘﻮ ﺇﻟﻲ ﺷﻮﻑ ﺍﻟﻌﻴﻦ .. ﺑﺲ ﻣﺮﻗﺘﺎ ﻟﻠﻘﺼﺔ ﻭ ﺣﺒﻴﺖ ﺃﻛﻤﻞ ﻟﻶﺧﺮ
ﺣﺎﻛﺎﻧﻲ .. ﻣﺎﺯﺣﻨﻲ .. ﻣﺎﺯﺣﺘﻮ
ﻏﺎﺯﻟﻨﻲ ﺍﺗﻘﺒﻠﺖ ﻏﺰﻟﻮ ... ﻛﻞ ﻳﻮﻡ ﻳﺒﻌﺘﻠﻲ ﻧﻜﺖ ﻭ ﺻﻮﺭ ﻭ ﻳﺴﺘﺮﺳﻞ ﺑﺎﻟﺤﺪﻳﺚ ﻣﻌﻲ .. ﻭ ﻣﺎﻳﺼﻴﺮ ﺍﻟﻠﻴﻞ ﺇﻻ ﻭ ﺷﻮﻓﻮ ﻗﺎﻋﺪ ﻋﻠﻰ ﻫﺎﻟﻼﺑﺘﻮﺏ ﻣﻨﺪﻣﺞ
ﻗﺎﻝ ﺷﻮ !!! ﻋﻨﺪﻭ ﺷﻐﻞ ﻋﻢ ﻳﺨﻠﺼﻮ ﻭ ﺃﻧﺎ ﺃﻋﻤﻞ ﺣﺎﻟﻲ ﻣﺸﻐﻮﻟﺔ ﺑﺎﻟﻤﻄﺒﺦ ﻭ ﻫﻮ ﻣﻤﻨﻮﻥ ﻃﺒﻌﺎ ﻣﻦ ﺍﻧﺸﻐﺎﻟﻲ . ﻭ ﺻﻴﺮ ﺃﺣﺎﻛﻴﻪ ﻣﻦ ﺍﻟﻤﻄﺒﺦ
ﻣﺮﺕ ﺍﻷﻳﺎﻡ ﻋﻠﻰ ﻫﺎﻟﻤﻨﻮﺍﻝ .. ﻛﻞ ﻳﻮﻡ ﻧﻜﺖ ﻭ ﻓﺮﻓﺸﺔ ﻭ ﻏﺰﻝ ﻭ ﻛﻼﻡ ﻧﺎﻋﻢ ﻋﺎﻟﻔﻴﺲ .. ﻭ ﺑﺎﻟﺒﻴﺖ ﻣﻨﻜﺪ ﻋﻴﺸﺘﻲ ﻭ ﻣﻄﺎﻟﻊ ﻋﻴﻨﻲ ﻭ ﺿﺎﺭﺏ ﺑﻮﺯ ...
ﺑﻌﺪ ﻫﺎﻟﻔﺘﺮﺓ ﻗﻠﻲ .. ﺑﺪﻱ ﺷﻮﻑ ﺻﻮﺭﺗﻚ !!! ﻗﻤﺖ ﻗﻠﺘﻠﻮ : ﺍﻱ ﺗﻜﺮﻡ ﻋﻴﻮﻧﻚ ... ﻟﻴﺶ ﻷ ؟ ﻭ ﺭﺣﺖ ﺑﻌﺘﻠﻮ ﺻﻮﺭﺓ ﻟﺼﺒﻴﺔ ﺑﺘﺎﺧﺪ ﺍﻟﻌﻘﻞ ﻣﻦ ﺍﻟﻨﺖ ..
ﺍﻟﺰﻟﻤﺔ ﻃﺎﺭ ﻋﻘﻠﻮ ﻭ ﺷﻄﺖ ﺭﻳﺎﻟﺘﻮ ﻭ ﺻﺎﺭ ﻣﺘﻞ ﺍﻟﻤﺠﻨﻮﻥ ... ﻭ ﺃﻧﺎ ﺑﻴﻨﻲ ﻭ ﺑﻴﻦ ﺣﺎﻟﻲ ﻋﻢ ﺍﺗﻔﺮﻓﻂ ... ﺑﺲ ﻗﺎﻭﻣﺖ ﻭ ﻛﻤﻠﺖ
ﺳﺄﻟﻨﻲ ﺃﻧﺖ ﻣﺮﺗﺒﻄﺔ؟ ﻗﻠﺖ : ﻷ
ﻗﺎﻝ ﻃﻴﺐ ﺑﺘﺘﺠﻮﺯﻳﻨﻲ ؟؟؟؟
ﻗﻠﺘﻠﻮ ﺑﺲ ﺃﻧﺖ ﻣﺘﺠﻮﺯ !!!
ﻗﺎﻝ ﺑﺎﻟﻠﻪ ﻣﺎ ﺗﺬﻛﺮﻳﻨﻲ ... ﻫﻲ ﻭﺣﺪﺓ ﻧﺌﺎﺋﺔ ﻧﻜﺪﻳﺔ ﻭ ﻣﺎ ﺑﺘﻨﻄﺎﻕ ..
ﻗﻠﺘﻠﻮ ﻣﺎﺷﻲ .. ﺑﺲ ﺃﻧﺎ ﻣﻬﺮﻱ ﻏﺎﻟﻲ ﻭﺃﻧﺎ ﻭﺣﺪﺓ ﺩﻟﻮﻋﺔ ﻭ ﺑﻴﻠﺒﺌﻠﻲ .. ﻭ ﺃﺻﻼ ﻣﺸﺎﻥ ﺃﻫﻠﻲ ﻳﻮﺍﻓﻘﻮﺍ ﻋﻠﻴﻚ ﺑﺪﻱ ﻣﻨﻚ ﻃﻘﻢ ﺩﻫﺐ ﻏﺎﻟﻲ ... ﻗﻠﻲ ﺃﻧﺖ ﺗﺄﻣﺮﻱ ﻳﺎ ﻋﻴﻮﻧﻲ ....
ﻋﻴﻮﻧﻪ ﺑﺌﻰ .. ﻛﺎﻧﺖ ﺣﺎﻃﺔ ﻋﻴﻨﻴﻬﺎ ﻋﻠﻰ ﻃﻘﻢ ﺩﻫﺐ ﺑﺄﻟﻤﺎﺱ ﺑﻴﺼﻄﻞ ﺑﻤﺤﻞ ﻣﻌﻴﻦ ... ﻃﻠﺒﺖ ﻣﻨﻮ ﻳﺸﺘﺮﻳﻪ ﻭ ﻳﺠﻴﻨﻲ
ﺍﺑﻦ ﺍﻟﻤﻠﻌﻮﻧﺔ .. ﺭﺍﺡ ﺍﺷﺘﺮﺍﻩ ﺑﺠﺪ ﻭ ﺭﺟﻊ ﻳﺤﺎﻛﻴﻨﻲ ﻭ ﻳﻄﻠﺐ ﻣﻨﻲ ﺍﻟﻌﻨﻮﺍﻥ ﻣﺸﺎﻥ ﻳﻘﺎﺑﻞ ﺃﻫﻠﻲ ﻭ ﻳﻄﻠﺒﻨﻲ ﻭ ﻳﻠﺒﺲ ﺍﻟﺪﻫﺐ
ﻗﻠﺘﻠﻮ ﺍﻧﺘﺒﻪ .. ﻟﺘﻘﻮﻡ ﻣﺮﺗﻚ ﺍﻟﻨﻘﺎﻗﺔ ﺍﻟﻨﻜﺪﻳﺔ ﺗﺸﻮﻓﻮ ﻭ ﺗﺨﺮﺑﻄﻠﻨﺎ ﺍﻟﻘﺼﺔ .. ﻗﻠﻲ ﻻ ﺗﺎﻛﻠﻲ ﻫﻢ ﺃﻧﺎ ﺣﻄﻴﺘﻮ ﺑﺴﺤﺎﺑﺔ ﻣﻜﺘﺒﻲ ﻭ ﻗﺎﻓﻞ ﻋﻠﻴﻪ ..
ﻗﻠﺘﻠﻮ : ﻳﺎ ﻋﻴﻨﻲ ﻋﻠﻴﻚ ﺷﻮ ﺣﺮﻳﺺ ... ﻭ ﺻﺮﺕ ﺍﺩﻟﻊ ﻋﻠﻴﻪ ... ﺑﻴﺒﻲ ﺑﻴﺒﻲ ﻫﻼ ﺑﺠﺪ .. ﺃﻧﺖ ﺷﻮ ﺧﻼﻙ ﺗﺤﺒﻨﻲ ﻫﺎﻟﻘﺪ ؟؟ ﺷﻜﻠﻲ ﺑﺲ ؟؟؟ ﺍﻧﺘﻔﺾ ﻭﻗﺎﻝ .. ﻃﺒﻌﺎ ﻷ ... ﺭﻭﺣﻚ ﺍﻟﺤﻠﻮﺓ ﻭ ﺩﻟﻌﻚ ﻭ ﺧﻔﺔ ﺩﻣﻚ ﺷﺪﻭﻧﻲ ﺇﻟﻚ .. ﺃﻣﺎ ﺍﻟﺸﻜﻞ ﺃﺧﺮ ﺷﻲ ﺑﻔﻜﺮ ﻓﻴﻪ ... ﻗﻠﺘﻠﻮ ﻣﻨﻴﺢ ﻃﻤﻨﺘﻨﻲ
ﻣﺸﺎﻥ ﻫﻴﻚ ﺭﺡ ﺃﺑﻌﺘﻠﻚ ﺻﻮﺭﺗﻲ ﺍﻟﺤﻘﻴﻘﻴﺔ ... ﻗﻠﻲ ﻳﻌﻨﻲ ﺃﻧﺖ ﻣﻮ ﺣﻠﻮﺓ ؟؟؟ ﻭ ﻫﺪﻳﻚ ﺍﻟﺼﻮﺭﺓ ﻣﻮ ﺻﻮﺭﺗﻚ ؟؟؟ ﻗﻠﺘﻠﻮ : ﻷ ﺍﻣﺒﻠﻰ ﺃﻧﺎ ﺣﻠﻮﺓ ﻻﺗﺨﺎﻑ
ﺑﺲ ﺍﻟﺼﻮﺭﺓ ﻣﻮ ﺻﻮﺭﺗﻲ ... ﺟﻤﺪ ﺷﻮﻱ ﻭﺭﺟﻊ ﻛﻤﻞ .. ﻗﺎﻝ ﻣﻮ ﻣﺸﻜﻠﺔ .. ﺍﺑﻌﺘﻴﻠﻲ ﺻﻮﺭﺗﻚ ﺍﻟﺤﻘﻴﻘﻴﺔ
ﻭ ﻗﻤﺖ ﺑﻌﺘﻠﻮ ﺻﻮﺭﺓ ﺃﻣﻪ .. ﺣﻤﺎﺗﻲ ﺍﻟﻌﺰﻳﺰﺓ . ﻫﻮﻥ ﺑﻜﻰ ﺍﺑﻠﻴﺲ .........................
ﺑﻴﺒﻲ ... ﺑﻴﺒﻲ .. ﺣﺒﻴﺒﻲ ... ﺣﻴﺎﺗﻲ ... ﻭﻳﻦ ﺭﺣﺖ ؟؟؟ ﺍﻟﺤﻠﻮ ﺭﺍﺡ ﺑﻐﻴﺒﻮﺑﺔ ﺳﻜﺮ ﻭ ﻗﻀﻰ ﻟﻴﻠﺔ ﺑﺎﻟﻌﻨﺎﻳﺔ ﺍﻟﻤﺮﻛﺰﺓ
ﻭ ﺣﺎﻟﻴﺎ ﺻﺮﻟﻮ ﺃﺳﺒﻮﻉ ﻓﺎﻗﺪ ﺍﻟﻨﻄﻖ ﻭ ﻟﺴﺎﻧﻮ ﻣﻠﻮﻭﻕ ﻋﺎﻟﻴﻤﻴﻦ
ﻭ ﻣﻮ ﻗﺎﺩﺭ ﻏﻴﺮ ﻳﺄﺷﺮ ﺗﺄﺷﻴﺮ
ﻭ ﺑﻴﻄﻠﻊ ﻓﻴﻨﻲ ﻧﻈﺮﺍﺕ .. ﻭ ﺍﻟﻠﻪ ﻣﺎﻗﺪﺭﺕ ﻓﺴﺮﺍ .. ﻫﻴﻪ ﺍﻋﺘﺬﺍﺭ .. ﻫﻴﻪ ﺃﺳﻒ .. ﻫﻴﻪ ﻧﺪﻡ .. ﻣﺎﻓﻬﻤﺖ ﺑﺲ ﺑﺎﻷﺧﺮ ﻗﺮﺭﺕ ﻟﺤﺎﻟﻲ ﺃﻧﻮ ﻫﻲ ﻧﻈﺮﺍﺕ ﺗﺴﺎﺅﻝ ﺃﻧﻮ ﺷﻮ ﺻﺎﺭ ﺑﻄﻘﻢ ﺍﻟﺬﻫﺐ ؟؟؟
ﻣﺸﺎﻥ ﻻ ﺗﺘﺄﺧﺮ ﺣﺎﻟﺘﻮ ﻟﻮﺭﺍ ﺭﺣﺖ ﻓﺘﺤﺖ ﺍﻟﺪﺭﺝ ﻭ ﻃﺎﻟﻌﺖ ﺍﻟﻄﻘﻢ ﻭ ﻟﺒﺴﺘﻮ ﻭ ﺟﻴﺖ ﻭﻗﻔﺖ ﻣﻘﺎﺑﻴﻠﻮ .. ﻗﺎﻡ ﺍﻟﺤﻠﻮ ﺣﺘﻰ ﺍﻳﺪﻭ ﻳﻠﻲ ﻛﺎﻥ ﻳﺄﺷﺮ ﻓﻴﻬﺎ ﺟﻤﺪﺕ ﺑﺄﺭﺿﺎ ....

الله يرحمو كان ماشي حالو