مصطلح ISP و مصطلح IP بنقل المعلومات

ISP:
Internet Service Provider هي الشركة يلي عم توزع انترنت عالبلد وامثلة من هالشركات بسوريا هنن (البريد، SCS-NET، آية، MTN...)
IP address:
192.168.1.1 اذا محاول شي مرة تغير كلمة سر الراوتر تبعك، اكيد بتعرف هالرقم
كل جهاز جوات بيتك متصل بالانترنت الو IP مخصص الو ضمن شبكة بيتك والراوتر اغلبية الوقت بشكل افتراضي بكون ال IP تبعو هو هاد الرقم فال IP هو متل عنوان لكل جهاز متصل بالانترنت او بشبكة ما.

Domains:
Google.com, facebook.com, youtube.com…
هدول اسمهن Domain
DNS (Domain Name Service)
هلا نحن منعرف Youtube.com بس لما نكتب Youtube.com في دفتر بشبه دفتر التلفونات بطلع عهاد ال Domain اش ال IP تبعو وبتصل فيو.
يعني الفكرة الأساسية انو كل Domain الو IP خاص فيه وهدول الأرقام وال Domains محفوظين بشي اسمو DNS

طريقة العمل:
- فتحت Google.com
- المتصفح تبعك بسأل ال DNS شو هو ال IP تبع غوغل
- لما يعرف الجواب ببعت رسالة لهال IP انو انا بدي Google.com
- هي الرسالة بتصل لعند ال data-center تبع غوغل يلي موجود باميركا
- ال Data center بدوّر عالصفحة يلي انت طالبها ضمن ال Servers الموجودين
- ال Data center برجعلك هي الصفحة عموبايلك وانت بتشوف الصفحة يلي طلبتها.

طريقة النقل:
يعني انا لما بدي ابعت رسالة انو بدي هالصفحة من Googleكيف عم تنتقل ال Request من سوريا لاميركا وبعدها برجعلي Response من اميركا لسوريا بتضمن الصفحة يلي بدي ياهو ؟
هاد النقل بصير عن طريق كبل اسمو Optical Fiber Cable
بتعرف القصة تبع لما بقطع النت بسوريا بتطلع قناة سما بتقلك في حوت اكل كبل الانترنت ؟ هاد هو الكبل نفسو.
هاد الشريط طولو آلاف الكيلومترات وبمر من بحار وجبال هاد الكبل بكون تحت الأرض وبقاع البحر (عن طريق سفينة الها محراث بثبتو بقاع البحر)
بتنتقل الإشارة من خلاله على شكل إشارة ضوئية (بسرعة الضوء) من ال data-center لعند ال ISP يلي بكون عندها راوترات بحولو الإشارة الضوئية تبع الكبل لاشارة كهربائية وبتوصل عن طريق خط التلفون على الراوتر تبع بيتك يلي من خلالو بتجي على موبايلك او لابتوبك وبتفتح معك الصفحة او الموقع او الصورة..
طبعاً اذا عم تستخدم 3G او 4G بتنتقل الإشارة من ال Optical Fiber لبرج من أبراج سيرياتيل وبتصل لموبايلك عن طريق أمواج كهرومغناطيسية
هالاشارات هي ببساطة صفار وواحدات. يعني البوست يلي عم تقراهو او الصورة يلي بتشوفها هي عبارة عن اصفار وواحدات عم تجيك من ال Data-center الخاص بفايسبوك يلي موجود باميركا.