المكنسة النيعمة ( منكسة بالحلبي)

#المكنسة
 المكنسة النيعمة ( منكسة بالحلبي) 
كانت تجي من السوق بيدرة شعرا .. مفرودة  طول وعرض .. أول ما تعملو ست البيت تقصقصلا طرافا حتى تساويا ببعضا .. وتصير تكنس منيح ..  
وع الاستعمال تفلت المنكسة وتقع جرزة منا ... تقوم تلبسا جرابة ووتخيطا ببعض .. وترجع تشتغل معا ... وهالمكنسة كلمالا بتقد وبتصغر .. تعملا لتكنيس الأباجور وتنفيضو من الغبرا .. ويجي يوم التعزيل .. تربطا بساموك وتعسف فيا قراني السقف .. 
وكانوا يشوفوا البنت شعرا طويل مالو هيئة ولا تول يقولوا متل دناب المكنسة .. 
وكانوا يفحصوا البنت اذا ست بيت من مسكة مكنستا .. 
وكانت الأم توجه وتطبخ وما تسأل على مزاج كل واحد بالعيلة لأن الجوعان بياكل قرمة المكنسة 
وكان اذا ولد صغير شحط شغلة اكبر منو يقولوا لو : الفارة ما وسعا درخوشا جرت مكنسة وراها .. 
وكانوا يوم سفر حدا من البيت ما يكنسوا مشان ما يكنْسوا أتره من البيت .. 
وكانوا اذا قعد الضيف وطول عندن .. يجكوا بالمكنسة دبوس ويقولو: تحت عود فوقك عود لا يجيك بروك ولاقعود .. يقوم الزلمة ويتيسر .. 
ومن تحزوراتن: عجوز ختياره بتمشي عراسا وگرّاره، الأيام فكفكت زنّارا ( هي الأخيرة من موسوعة حلب المقارنة لخير الدين الأسدي ) .....