المفاهيم الخاطئة بحساب البطارية المناسبة

بعض المفاهيم الغلط بحساب البطارية المناسبة:
بزمناتو اول الازمة كانت العالم وقت بدها تجيب بطارية لتشغل الليدات كانت تحسب :
سحب اللدة = 1.5 أمبير *5 لدات بطلع معو 7.5 امبير
-بقلك معناتا بطارية 7 امبير مناسبة / وطبعا هي جريمة بحق البطارية /
طبعا اغلب العالم حرقت بطاريات لشبعت وعرفت بعد كتير تجارب انو هل الحكي خطأ بس بعد ما عالم كتيير خسرت مصاري
وبوقتها كان لسى وضع الكهرباء احسن من هلق
-------------------------------------------------------------
خلنا نرجع لوقتنا هلق ونشوف الجرائم لجديدة يلي عم ترتكب بحق البطارية
اول جريمة بطارية المصباح السحري #الجل وهي بطارية اقل من عاديه وما فيها شي مميز غير انو ما بدها اضافة مي ؟!
- لكن شو قصة انها احسن بطارية والكل بينصح فيها ؟!
الجل ما بدل على قوة البطارية بنوب ، انما هي مجرد تقنية عزل بين الواح البطارية وهل الشي بحسن من اداء البطارية بس بنسبة ما بتتجاوز 15% ومقياس قوة البطارية الحقيقي هو نوع الالواح ويلي هو ممكن يكون رصاص عادي او #انبوبي وحطلي عشر خطوط تحت انبوبي لانو في كتيير عالم عم تخلط بالموضوع بتقلك الجيل احسن من الانبوبي
والانبوبي شي والجيل شي تاني / الانبوبي نوع البلاكات وهي تعتبر افضل تقنية للبلاكات والجل هو المادة العازلة ويلي ما بتدخل كتيير بجودة البطارية مقارنتا بجودة البلاكات /
وللعلم في انبوبي جيل وطبعا تعتبر الافضل بين البطاريات طبعا بعد رأس الهرم وهي الليثيوم وهي بحث لحالة
------------------------------------------------------------

نرجع للمهم وهو الجريمة التانية بحق البطاريات وجيبتك سوا
- حساب البطارية المناسبة ألك
اغلب العالم ومنها فنيين وكهربائين بتغدرك بهال الموضوع وهي :
على سبيل المثال البطارية المناسبة ل 3 ليدات بالبيت وراوتر وشاحن موبايل على البطارية
5 ليدات × 1.5 امبير = 7.5 A
راوتر بشكل تقريبي = 1 A
شاحن جوال تقريبا =1 A
الاجمالي = 9.5 × 5 ساعات قطع = 47.5 A
الحمولة كلها بفترة القطع 47.5 في ناس عم تجمع معها نسبة 30% مشان ما تفضي البطارية وهل الشي جيد بيطلع الاجمالي 62 امبير اجمالي
لهون الامور بخير بيقلك اخي بطارية 75 او 100 منيحة هون بتجي المشكلة انو غفلنا عن اهم جزء بالمعادلة وهي فترة الشحن ويلي هي ساعة وحدة ، وهون الطامة الكبرة
عندك حمولة 60 امبير لازم تنشحن بساعة واحيانا اقل طيب كيف بدك تظبطها ، لازم تنشحن بطاريتك 60 امبير خلال ساعة والبطارية ال 100 او حتى ال 200 ما بتتحمل شحن 60 امبير خلال ساعة
طيب هون كيف بدي احسب البطارية المناسبة بعد ما عرفت حمولتي
بكل بساطة بضرب الحمولة ب 5 على اقل تقديررررر والاجمالي بيطلع بطارية بتتحمل كامل الحمولة مع القدرة انها تنشحن بساعة وبدون ما تنضرب
60 × 5 = 300 امبير بطارية
وبتحطلها شاحن 60 امبير
واحد هلق بيتسائل انو معقول مشان شغل 5 ليدات وراوتر وشاحن موبايل جيب بطارية 300 امبير
اجل يا عزيز لازم هيك تعمل لتعيش البطارية شغلة سنة او سنة ونص
مشان ما تسب على التجار وتقول البضاعة مغشوشة وزمان كانت تعيش البطارية سنة وسنتين هلق يدوب اشهر
زمان يا عزيزي الكهرباء كانت احسن فبطاريتك عاشت اكتر هلق الوضع اختلف والحسابات اختلفت
-بوضعنا هلق نصيحة اخوية شو ما كان وضعك لا تشتري بطارية تحت ال 100 امبير لو بدك تشغل عليها لدتين فقط لانها يا دوب تكفي
-يمكن ما تقدر تشتري البطارية المناسبة بس حاول تقلل الضرر قدر الاستطاعة بتخفيف الحمولة وتكبييير البطارية

اسف على الاطالة بس وجب التنبيه

شكرا على هذا الموضوع الهام