سبب الدوخة فجأة لماتيقوم بسرعة

بتكون متسطح أو قاعد، و بتسمع صوت برا ف بتقوم بسرعة كأنك البطل اللي حينقذ الموقف هنيك

فجأة بتحس بدوخة و إنه الدنيا صارت تفتل فيك و بتضل هالحالة عدة ثواني من بعدا بتروح تشوف شو صاير برواق...

عرفتوها صح؟ أغلبية اللي منعرفهن بيعانوا منها

#الدوخة / #Dizziness : اللي بيصير إنه لما نوقف بسرعة الدم بيروح للقدمين بسبب الجاذبية، وهاد اللي بيتسبب #بهبوط_ضغط_الدم ، من بعدا بيتسرع القلب ليعالج التغير اللي صار... و هون بتتقلص الأوعية الدموية لتمنع تجمع الدم بالكامل بالقدمين هبوط ضغط الدم الانتصابي و اللي فينا نعتبره سبب رئيسي للدوخة بهي الحالة.

و في #أسباب_تانية لحدوث الدوخة متل:

التهاب الأعصاب الطرفية
الإصابة بالجلطة القلبية
اعتلال عصبي لا إرادي
مرض أديسون
و ممكن تزداد بسبب:

فقر الدم / السكري / الحمل / أمراض الغدد الصماء / الاستلقاء لوقت طويل

عادةً بتترافق الدوخة مع #أعراض متل :

🧪 خفقان القلب و ألم في الصدر
🧪 ألم الرأس و الصداع
🧪 الغثيان / الإغماء
🧪 تشوش بالرؤية و ضعف عام
🧪 ألم بالرقبة و بالكتفين
🧪 فقدان توازن

العلاج:

الدوخة عادةً بتروح لحالها، و لكن بتدابير بسيطة بتقدر تخفف من احتمالية حدوث الدوخة:

شرب كميات كافية من السوائل ( السوائل مش متة ها )
تسطح لحتى الدوخة تروح، و من بعدها بتقوم على مهلك و ما توقف بسرعة أبداً بعد ما تقعد أو تتسطح لفترة طويلة
ممارسة الرياضة بانتظام
عدم المشي أثناء الجو الحار
لما بدك تنام خلي راسك أعلى من مستوى جسمك بنتفة
تجنب القهوة، الدخان، الكحول و المخد.رات

و طبعاً بحال كانت الدوخة عم تستمر بالحدوث و التدابير السابقة مش عم تفيدك ف هون منتوجه للطبيب فوراً.